بوقالات جزائرية عن الشوق - بوقالات جزائري لسهرات رمضان - بوقالات جزائرية للفال.


لالة يا لالة بيني وبينك جبال أنتي قلبك قاسح وأنا قلبي مدبال أنت قلتيلي نسيتك أو نحيتك من البال وأنا مازال نبغيك أو نخسر عليك المال

طلعت للسطح دليت رجليا جا الفاكتور أعطاني بريا قبل ما نفتحها فشلو يديا وقبل ما نقراها سالو دموع عينيا

بالبشارة بشروني وبالحنة زرتوني وعلى الغالي إنشاء الله تهنوني

غـالـي غالـي والـغـالـي ربـي... مهمـا نروح ونغيـب معزتـك يا لميمة فـي قلبـي...يا لي في هواك نموت.... مال الدنيا ماشي غالي... انت الذهب و الياقوت...

يا فلفل طرشي واشبيك، اذا بيك على الماكلة راني شبعانة واذا بيك على الماء راني رويانة واذا بيك على التحواس راني عيانة واذا بيك على هاداك الشباب ما نديه غير انايا

فمــي وفمك فـــي الكـــأس وسري وسرك واش وصلو للناس سري زجاج إذا تكسر خلاص

ليلة من الليالي وأنا قاعدة حزينة
خرجلي بدر الليالي قالي يالعدرة واشبيك حزينة
إذا بيك على الحبيب الليلة يجيك وهو راه متفكرك ديم

سهرت الليالي و انا نسنى في حلالي حلالي اللي رايحة نبني معاه داري و نجيبلو لبنات و الدراري حلالي اللي هو راس مالي غالي فالسوم و شانو عالي

البير بيرك ومايشرب منو غيرك اللي يبغيك واللي يعرف قيمتك هو اللي يديك

بخرتك بلجاوي و حطيتك في قصر عالي يا حمامة طيري للعالي و جيبيلي أخبار لحبيب الغالي

ماني طبسى نتكسر ماني وردة تذبال راني خاتم دهب ولويزة في يد سيد الرجال.

إرسال تعليق

ملحوظة: يمكن لأعضاء المدونة فقط إرسال تعليق.

 
Top